लुम्बिनी रिभ्यू
काठमाडाैँ । गुल्मीको सत्यवती गाउँपालिका वडा नं ८ का वडाध्यक्ष होमबहादुर रानाले विवाहित महिलालाई अविवाहित सिफारिस गरेपछि अहिले चर्चामा आएका छन् ।
आइतबार वडा कार्यालयले दिएको सिफारिसमा स्थानीय गौमाया आलेलाई अविवाहित प्रमाणित गरेको सिफारिस पत्र बाहिर आएपछि सबैको चासो बढेको हो ।
सिफारिस पत्रमा सत्यवती गाउँपालिका ८ भोसै निवासी हिरालाल छन्तेलको छोरी, रामबहादुर आलेको श्रीमती नाप्रनं १६ की गौमाया आलेलाई अविवाहित भएको सिफारिस गरिएको छ भन्ने पत्रमा वडाध्यक्ष होमबहादुर रानाले हस्ताक्षर गरेका छन् ।
वडाध्यक्ष रानाले आइतबार भिडभाडको समयमा ख्याल नगर्दा कमजोरीले यस्तो भएको स्वीकार गरेका छन् ।
‘एकल महिलाका लागि दिन यस्तो पत्र बनाइएको थियो, उहाँलाई अर्कै सिफारिस दिनुपर्नेमा यस्तो भएछ, पछि सच्चाइएको छ तर प्रचारमा यही गल्तीलाई मात्र ल्याइयो, कमजोरी स्वीकारेका छौँ’, रानाले भने ।
उनले गल्तीसँगै सच्चाइएको पनि पत्र राखिदिन पत्रकारलाई आग्रह गरेका छन् ।
दिनभर भाइरल भएकाे पत्रबारेकाे याे समाचार नेपाल प्रेस लगायतमा अनलाईनहरुले प्रकाशित गरेका छन् ।
सच्चाइएको पत्रमा श्रीमानकाे मृत्युपछि निज गौमायाले हालसम्म अर्काे बिबाह नगरेकाे ब्यहाेरा उल्लेख छ ।
