सुरु भयाे ‘अध्ययन र अनुभूति’ श्रृंखला, सूचनाको दुरुपयोग चुनौतिपूर्णः ज्ञवाली::News from Lumbini

गलत सूचनाको प्रवाह र सूचना प्रविधिको दुरुपयोगले समाजमा अनेक भ्रम फैलिने गरेका उदाहरणहरु प्रस्तुत गर्दै उपमहासचिव ज्ञवालीले नयाँ नयाँ सूचना प्रविधिलाई नयाँ ढंगले सही सदुपयोग गर्नु पर्ने आवश्यकता औल्याउनुभयो ।

काठमाडौ । नेकपा (एमाले) केन्द्रीय स्कुल विभागले रुपान्तरणका लागि पठन संस्कृति बढाउन ‘अध्ययन र अनुभूति’ श्रृंखला सुरु गरेको छ । मंगलबार पार्टी केन्द्रीय कार्यलय च्यासलबाट यस्तो श्रृंखला सुरु भएको हो ।
पहिलो श्रृंखलामा पार्टी उपमहासचिव तथा विभाग प्रमुख प्रदीप ज्ञवाली प्रस्तुत हुनुभयो । उहाँले ईजरायली लेखक युवाल नोहा हरारीको चर्चित पुस्तक नेक्ससको अध्ययनपछिका अनुभूति सुनाउनुभयो ।

सो अवसरमा उहाँले सूचनाको दुरुपयोग संसारकै लागि चुनौतिपूर्ण रहेको बताउनुभयो । सूचनाको दुरुपयोगले ब्यवस्था नै कमजोर हुने चर्चा गर्दै विभाग प्रमुख ज्ञवालीले सही र गलत सूचना छुट्याउन अध्ययन तथा तथ्य जाँच जरुरी रहेको उल्लेख गर्नुभयो ।

नेपालको सन्दर्भमा चर्चा गर्दै उहाँले मिडिया साक्षरता कमजोर रहेको बताउनुभयो । मिडिया साक्षरता बढाउँदा हरेक क्षेत्रमा सकारात्मक परिणाम हासिल हुने उहाँको धारणा छ ।
गलत सूचनाको प्रवाह र सूचना प्रविधिको दुरुपयोगले समाजमा अनेक भ्रम फैलिने गरेका उदाहरणहरु प्रस्तुत गर्दै उपमहासचिव ज्ञवालीले नयाँ नयाँ सूचना प्रविधिलाई नयाँ ढंगले सही सदुपयोग गर्नु पर्ने आवश्यकता औल्याउनुभयो ।