बुटवल, वैदेशिक रोजगार वोर्डले नेपालका ५६ प्रतिशत भन्दा बढि घरपरिवारमा विप्रेषण आउने तथ्यांक सार्वजनिक गरेको छ ।
वैदेशिक रोजगार वोर्डले सोमबार बुटवलमा आयोजना गरेको अन्तरक्रिया कार्यक्रममा गत आर्थिक वर्ष २०७९÷८० मा मात्रै वैदेशिक रोजगारीबाट १२ खर्ब २० अर्ब ५६ करोड रुपैया रेमिट्यान्स आएको र ५६ प्रतिशत भन्दा बढि घरपरिवारमा पुगेको जनाएको होे । जुन कुल ग्राहस्थ उत्पादनको करिब २३ प्रतिशत हो ।
बोर्डका निर्देशक टिकाराम ढकालले सीप नसिकी र आफूले गर्ने आम्दानीको अनुमान नराखी वैदेशिक रोजगारीमा जादा भने फाइदा नहुने बताए । बोर्डको तथ्यांक अनुसार गत आर्थिक वर्ष २०७९÷०८० मा ७ लाख ७१ हजार ३ सय २७ जना वैदेशिक रोजगारमा गएका थिए ।
श्रम कार्यालय बुटवलका प्रमुख केशवराज भट्टराइले सीप सिक्नु साटो नक्कली प्रमाणपत्र बनाउने र कामबारे बेखबर भएर गएकाले वैदेशिक रोजगारमा पनि दुःख पाएको बताए । श्रम स्वीकृति नलिइ जाने, यौटा देश भनेर अर्कोमा जाने , भिजिट भिसा र काम फेरेर गर्ने श्रमिकहरु समस्यामा पर्दा समेत सरकारी सहयोग नहुने भएकाले स्थानीय तहमा काम गर्ने सरोकारवालाले नै रोक्नुपर्ने उनको भनाइ थियो ।

सुरक्षित वैदेशिक रोजगारमा काम गर्ने सरोकारवालाले भने वैदेशिक रोजगारीमा हुने ठगी विरुद्ध उजुरी दिने संरचना बनाउन, दर्ता विनाका विदेश पठाउने सस्था बन्द गराउन आग्रह गरेका थिए । सहभागीले विदेश गएर उतै बस्नेलाई निरुत्साहित गरी सिक्ने, कमाउने र सुरक्षित फर्कने प्रक्रियालाई सहयोग गर्नुपर्ने बताए । त्यसका लागि देशको नीतसंगै वैदेशिक रोजगारमा जाने व्यक्ति, घरपरिवार र समूदाय सहयोगी बन्नुपर्ने उनीहरुले बताए ।